Егда́ нѣ́сть лѣ́ть кому́ причасти́тися Святы́хъ и Животворя́щихъ Пречи́стыхъ Христо́выхъ Та́инъ Пло́ти и Кро́ви, да по совѣ́ту духо́внаго настоя́теля, егда́ вре́мя приспѣ́етъ, да причасти́тся свяще́нныя воды́ Богоявле́нія.

По обы́чномъ уготовле́ніи е́же ко причаще́нію, сія́ изглаго́летъ моле́нія:

Іере́й, сотвори́въ нача́ло по обы́чаю, [глаго́летъ]: Благослове́нъ Бо́гъ на́шъ... Та́же: Царю́ Небе́сный... Трисвято́е, и по Отче на́шъ. Іере́й: Яко Твое́ е́сть Ца́рство, и си́ла и сла́ва... Та́же: Го́споди поми́луй, 12. Сла́ва, и ны́нѣ. Пріидѣ́те поклони́мся, три́жды. Посе́мъ псало́мъ 50: Поми́луй мя́, Бо́же... Посе́мъ: Вѣ́рую во Еди́наго Бо́га...

Та́же тропари́ сія́, гла́съ 5: Иже ча́шу имѣ́я неисчерпа́емыхъ сокро́вищь, да́ждь ми почерпьсти́ во́ду сію́ во оставле́ніе грѣхо́въ, я́ко утѣсня́емъ е́смь жа́ждею, благоутро́бне Го́споди, и спаси́ мя́. Сла́ва, и ны́нѣ: Дѣ́во Чи́стая, Сло́ва пола́то, ду́шу мою́ покажи́ до́мъ Пресвята́го Ду́ха, воды́ исто́чника живонача́льна напо́й мя́, горѣ́ніемъ грѣха́ иста́ема, я́ко да по́ долгу сла́влю Тя́.

Посе́мъ моли́тва ко свято́му причаще́нію Іоа́нна Златоу́стаго: Го́споди Бо́же на́шъ, Иже со Безнача́льнымъ Твои́мъ Отце́мъ сразумѣва́емъ, и со Присносу́щнымъ и Безсме́ртнымъ Ду́хомъ спребыва́я, Иже вся́каго освяще́нія Да́тель, Иже и пре́жде Свои́мъ Креще́ніем во́ды освяти́лъ еси́, и ны́нѣ при́сно си́хъ, Твои́мъ Святы́мъ призыва́ніемъ, освяща́я Са́мъ, и се́ю свято́ю водо́ю, и прише́ствіемъ и дѣ́йствіемъ Свята́го Ду́ха, сотвори́ рабу́ Твоему́ (имяре́къ), бы́ти причаща́ющуся, въ просвѣще́ніе души́, во освяще́ніе тѣ́лу, во умерщве́ніе страсте́мъ, во отверже́ніе лука́выхъ по́мыслъ, во отложе́ніе лука́ваго настоя́ніи, во храни́ло на вся́ку по́льзу прили́чну; я́ко да ея́ благода́тію покрыва́емъ, невреже́нъ отъ вся́каго навѣ́та пребу́детъ, въ сла́ву Твоего́ преблага́го и свята́го и́мени, моли́твами Пречи́стыя Ти́ Ма́тере Влады́чица на́шея Богоро́дица и всѣ́хъ святы́хъ, ами́нь.

Та́же сотво́рь три́ покло́ны, глаго́ля тропа́рь Креще́нію, гла́съ 1: Во Іерда́ни креща́ющу Ти ся Го́споди, Тро́ическое яви́ся поклоня́ніе: Роди́телевъ бо гла́съ свидѣ́тельствоваше Ти́, возлю́бленнаго Тя́ Сы́на имену́я, и Ду́хъ въ видѣ́ніи голуби́нѣ извѣ́стоваше словеси́ утверже́ніе: явле́ися, Христе́ Бо́же, и мíръ просвѣще́и, сла́ва Тебѣ́. Сла́ва, и ны́нѣ, конда́къ, гла́съ 4: Яви́лся еси́ дне́сь вселе́ннѣй, свѣ́тъ Тво́й, Го́споди, зна́менася на на́съ, и́же въ ра́зумѣ пою́щихъ Тя́: пріи́де бо и яви́ся, Свѣ́тъ неприкоснове́нныи.

Посе́мъ причасти́ся со́ страхомъ святы́я воды́ и со благобоя́зньствомъ.

Посе́мъ моли́тва, и́же во святы́хъ отца́ на́шего Іоа́нна Златоу́стаго, по причаще́ніи святы́я воды́: Сла́ва неизрече́ннѣй и неизлѣ́дованнѣй Ти́ бла́гости! Сла́ва премно́гому долготерпѣ́нію Твоему́! Сла́ва благоутро́бію Твоему́! Яко ны́нѣ мя́ грѣ́шнаго и недосто́йнаго раба́ своего́ освяще́ніемъ сподо́билъ еси́ освяще́нныя воды́ сея́ прича́стіемъ. Укрѣпи́ ми́ ея́ ра́ди живо́тъ, и, невреди́ма всего́ соблюда́я, неуловле́на мя́ сопроти́вными содѣ́лай, непорабо́щена покажи́ мя́ нечи́стымъ помысло́мъ, всего́ мя́ обнови́, всего́ во блага́я вождели́ дѣ́ланія, всего́ впери́ ко Твоему́ жела́нію. Яко Ты́ еси́ сла́дость душа́мъ на́шимъ, и Тебѣ́ сла́ву возсыла́емъ со Безнача́льнымъ Ти́ Отце́мъ и со Пресвяты́мъ и благи́мъ и животворя́щимъ Ти́ Ду́хомъ, ны́нѣ и при́сно и во́ вѣки вѣко́мъ, ами́нь.

Іере́й: Прему́дрость. Та́же: Досто́йно е́сть... Сла́ва, и ны́нѣ. Го́споди поми́луй, два́жды. Го́споди благослови́. Та́же отпу́стъ Креще́нію: Крести́выйся отъ Іоа́нна во Іерда́ни, Христо́съ и́стинный Бо́гъ на́шъ...

Источникъ: Потребникъ. — Москва: Печатный дворъ, 7141 [29 Іюня 1633 г.]. — Листъ 430-431 об. [Изданъ при царѣ Михаилѣ Ѳеодоровичѣ и патрiархѣ Филаретѣ]